أنا فاكرة زمان وأنا صغيرة قبل رمضان بأسبوع، لما أهلي كانوا يخدوني أنا و أخويا اللي كان وقتها عنده سبع سنين عشان نروح نجيب فوانيس من الأكشاك الصغيرة اللي بترص الفوانيس على أرصفة أحمد عرابي، و تشوف الشارع بينور و يطفي أحمر في أصفر من بعيد، كنا نختار الفوانيس و بعد مانروح نلاقي جدتي جيبلنا فوانيس هي كمان.
قبل رمضان بيومين لما مامتي كانت تنزل تجيب ياميش رمضان، و تروح البيت تفرد الحاجة على السفره و تجيب القطايف و تقعدني جنبها، تديني خمس قطايف بس ألعب بيهم، و ترميهم في الأخر عشان ببوظهم.
قبل رمضان بليلة لما كنا كلنا بنقول "ياااااه ريحة رمضان جات"، و نتفق مع قرايبنا هنتسحر فين.
أول يوم رمضان لما كنت أعيط لمامتي عشان ماتلبسنيش الطقم ده لأنه مش عجبني و كرشي بيبقى كبير و حمادة ابن خالتها بيعض يتريق عليا. (دلوقتي بقى يتريق على أخويا)
أنا فاكرة كل سنة، كل سنة نجيب الفوانيس، و نحشي القطايف، و نشم ريحة رمضان ، و حمادة يتريق عليا و يقولي يا تخينة.
لحد ما سنة جات و نسيت تجيب معها كل الكلام ده، دخلت علينا و إديها فاضية، سنة رخمة مارضيتش تنزل تجيب معانا الفوانيس؛ عشان كل الفوانيس بقت على أشكال عرايس و كرومبو و حاجات هبلة، السنة اللي بقيت أعمل فيها طبق القطايف كله عشان مامتي عارفة إني بقيت أعرف احشي الكمية الصح و اقفلها بمهارة، السنة اللي بطلت أعيط عشان بقيت أختار فيها الطقم إللي هالبسه لنفسي، السنة إللي حمادة بطل يتريق عليا فيها عشان كرشي لم بعضه و مشي (أو بمعنى أصح بقيت أعرف أشفطه كويس)
هي دي السنة اللي رمضان فقد فيها ريحته
السنة دي هي نفس السنة اللي قلبي بطل يدق جامد من السعادة بليل و معرفش أنام ليلة سفر، السنة اللي مامتي بطلت تذاكرلي فيها على السفره، و اللي بطلت أكلم فيها صاحبتي عشان نتفق هنجيب معانا إيه في رحلة المدرسة يسلينا واحنا في الطريق
السنة دي جات و مش راضية تمشى من ساعتها، يمكن حست إني برحب بيها ولا حاجة، بس واللهي لا دي فاهمة غلط
السنة اللي كل أيامها زي بعض
وأنا بصراحة زهقت
و ريحة رمضان وحشتني
أوي
