:قريت في كتاب رغبة في النسيان لمريم عبد الجابر الكلام ده
"أن تصحو على مكالمة تليفونية في الرابعة فجراً وتعرف أن أقرب صديق لك مات فجأة، وتدفنه، وتراه جسداً ملفوفاً في قطعة من القماش الأبيض في قبر تحت الأرض، وتعود إلى بيته وتغلق على نفسك غرفته، وتحتضن كل شئ لمسه يوماً وتبكي، وأنت تردد بصوت غير مسموع وحرقة آلاف المرات هيستيرياً سؤالاً خبرياً واحداً: "ليه يا رب؟" هذا موقف قد يجعل منك يوماً كاتباً جيداً."
هذا موقف قد يجعل منك إنساناً آخر، إنساناً في قمة الضعف واليأس والقوة.
من عشرة أيام أو أكتر كنت قاعدة في بيت صاحبتي، الناس داخلة خارجة بالأسود بتطبطب على كتفها وتقولّها معلش، وأنا قاعدة بتفرج عليها بتعيط ومش عارفة أعمل حاجة عشان عارفة إنها مش عايزة تسمع كلمة، مش عايزة أطبطب عليها ولا أحضنها عشان كنت مكسوفة إن أنا مش هاقدر أعملّها أكتر من كدة، وهي تعيط، وأنا مابعملش حاجة.
شمس من أقرب الأصحاب ليَ، ومن عشرة أيام أنا كنت واقفة قدامها ومش عارفة هي مين. أنا شايفة شمس بشعرها الكتير "المتناثر" في كل الاتجهات، وكحلها الأسود اللي من كتر ماهو اتحط في عينيها بقيت باشُك إنه لزق ومابيتشلش، مش عارفة أكلمها، ماعنديش حاجة أقولها، انتي مين وهاقولك إيه؟
بعدها بأسبوع، ومن حوالِ خمسة أيام، شمس كانت قاعدة معايا بتحكيلي عن اللي شافته؛
الصريخ اللي سمعته
العياط
التغسيل
القبر
وجدتها
حاكتلي إن هي الوحيدة من أخوتها اللي دخلت تشوف جدتها، اللي كانت قاعدة بتضحك معاهم الليلة اللي قبلها،
بتتغَسِل،
بتتغَسِل،
و
"في قطعة من القماش الأبيض في قبر تحت الأرض".
قلتلها ماكنتش المفروض تشوف كل ده عشان ماتتعبش. (أنا مش عارفة أقولّها إيه)
"يا سارة أنا ماكنش عندي وقت أفكر أعمل إيه وماعملش إيه، إنتي لما تبقي عارفة إن دي آخر لحظات هاتشوفي فيها حد لآخر مرة في حياتك، هاتعملي أي حاجة عشان تفضلي معاه."
روحت وفتحت كتاب رغبة في النسيان وقلِبت فيه عشان أقرا الكلام اللي فوق ده.
أيوة الموقف ده ماعملش من شمس كاتبة، شمس مابتعرفش تكتب، هي بترسم،
بس وهي بتعيط
والكحل سايح
بس وهي بتعيط
والكحل سايح
وهي بتحكيلي
أكنها بتحكي لنفسها لأول مرة
أنا شفت منها بني آدمة تانية
عمري ماشفتها قبل كدة
عمري ماشفتها قبل كدة
شمس
في قمة ضعفها.
وفي قمة قوتها.
الله يرحمِك يا سونا.
