كنت أستنى السجدة التانية وأعِد تلات تسبيحات قبل ماَبَلِم قدام ربنا وماعرفش هاطلب منه اللي أنا عايزاه إزاي، ماهو مش هايقبل مني دعاء لو فضلت أتأتأ وأخرف كلام مالوش معنى.

راسي والأرض مش طايقين بعض والدم كله قاعد بيدّلِق في دماغي. 

أصل ربنا مش هايسمع الدعاء كويس غير في وضع سجود. 

ألِم وأجمع في كام كلمة أرسُهم جنب بعض، بالعربي طبعاً، مافيش دعاء ولا بالإنجليزي ولا فرنساوي ولا عبري ولا مصري، أصل ربنا مابيسمعش غير للعربي. 

ولازم "اللهم" تقف مستقلة ومسيطرة. هي بتأكد الدعاء وتقويه. 

كنت باتعب وأنا بطلُب من ربي. فزهقت وبطلت أطلب. 

في يوم جه وجاب أخري وجابني الأرض، شفت نفسي في أضعف نقطة وصلتلها لحد دلوقتي، عيطت عشان مش لاقية حد يعملّي حاجة وعيطت أكتر عشان الحد الوحيد الواحد الأحد اللي ممكن يعملّي كل حاجة، مابعرفش أتكلم معاه. 

استسلمت للأمر الواقع وسِبته يضرب ويرزع فيَ لحد متبقاش حاجة، اتضيقت من ربنا عشان مش راضِ يسمع، كتمت كل الغضب واليأس اللي فيَ في هيئة صمت تام، "يا ربِ اعمل حاجة بقى!"، واصرخ وأنا عينايَ لفوق، سطح أودتي باصصلي بتعجب وبيضحك عليا ويقول "ايه المجنونة دي؟" 

في الفترة دي، بكل اليأس والقرف اللي جابِته، قررت أجرب أقولّه أي حاجة وكل حاجة، ولو عايز يسمع يتفضل ولو مش عايز خلاص، أكون عالأقل طلعت اللي جواية. اتكلمت، قعدت معاه كتير واتكلمنا. اتكلمت معاه وأنا قاعده علي سريري، وأنا ماشية لوحدي، وأنا رايحة المدرسة، وساعات في لحظات الوعي المخطوفة اللي مابين الحياة والنوم. وقتها كبرت شوية وفهمت إن ربنا بيفهم كل حاجة، مش دين وركع وسجود بس. ربنا بيسمع الحزن واليأس والحب والأمل، ده طلع بيسمع في أي وقت وفي أي مكان و أي كلام، وفي حالة الناس اللي مابيعرفوش يتكلموا زي حلاتي، ربنا بيسمع السكوت وبيسمعه كويس أوي.